फारम भर्ने युवाहरुको उल्लेख्य संख्या रहेकोले काठमाडौंको त्रिपुरेश्वरस्थित दशरथ रंगशालामा बुझ्ने व्यवस्था मिलाइएको छ । आवदेन गर्ने व्यक्तिले ग्लोबल बैंकमा प्रतिव्यक्ति १२ सय ७५ रुपैयाँ बुझाएको भौचर पेस गर्नुपर्ने वैदेशिक रोजगार विभागका महानिर्देशक मोहनकृष्ण सापकोटाले जानकारी दिनुभयो । फारम लिने र बुझाउने काम विहान नौं बजेदेखि बेलुका ६ बजेसम्म जारी रहनेछ  ।

२०२८ भदौ १४ देखि २०४९ भदौ १३ गतेभित्र जन्मिएका व्यक्तिले फारम भर्न पाउनेछन् । फारम भर्ने अन्तिम म्याद आउँदो चार गतेसम्म तोकिएको छ । त्यसपछि भदौ १२ र १३ गते भाषा परिक्षा लिइनेछ । आवेदकको संख्या बढी भए भाषा परीक्षाको समय दुई दिनबाट बढाउन सकिने विभागका महानिर्देशक सापकोटाले बताउनुभयो । परीक्षामा २ सयमध्ये ८० भन्दा बढी अंक ल्याउनेहरुमध्येबाट करिब चार हजार जना छानिनेछन् । परीक्षा व्यवस्थापनको जिम्मा त्रिभुवन विश्वविद्यालयलाई दिइएको छ ।

विगतको अनुभवको आधारमा यसपटक ४० देखि ५० हजारले आवेदन दिने अनुमान नेपालमा रहेको रोजगार अनुमति प्रणाली -इपिएस) कार्यालयले गरेको छ ।

पहिलो चरणमा छनोट भएका ६ हजार ५ सय ८६ मध्ये ६ हजार ४४ जनाको श्रम सम्झौता भइसकेको छ । तीमध्ये ३ हजार ९ सय ३६ कामदार कोरिया पुगिसकेका छन् । थप कामदार छनोटका लागि भाषा परीक्षा लिने क्रममा यो फारम खुला गरिएको हो ।

Total Comments :0